जळगाव एमआयडीसीतील चटई कामगाराची आत्महत्या

जळगाव टाइम्स प्रतिनिधी | जळगाव : घरी आलेल्या पाहुण्यांना पत्नी रिक्षा स्टॉपपर्यंत सोडण्यासाठी गेलेली असतांना, प्रेमचंद भगवान पवार (वय ४०, रा. साईनगर) यांनी घरासमोर असलेल्या छताला गळफास घेत आत्महत्या केली. पाहुण्यांना सोडनू पत्नी घरी आल्यानंतर त्यांना पती गळफास घेतलेल्या अवस्थेत दिसताच त्यांनी एकच आक्रोश केला. ही घटना सोमवारी दुपारी साडेअकरा वाजेच्या सुमारास उघडकीस आली. याप्रकरणी नशिराबाद पोलिसात अकस्मात मृत्यूची नोंद करण्यात आली आहे.

मिळालेल्या माहितीनुसार सविस्तर वृत्त असे की, शहरातील साईनगर परिसरात प्रेमचंद पवार हे कुटुंबियांसह वास्तव्यास होते. एमआयडीसीतील एका चंटई कंपनीत कामाला जावून कुटुंबाचा उदरनिर्वाह करत होते. त्यांच्या दोन मुली आणि मुलगा असे कामानिमित्त घराबाहेर गेले होते. त्यावेळी त्यांच्याकडे आलेल्या पाहुण्यांना रिक्षा स्टॉपपर्यंत सोडण्यासाठी त्यांची पत्नी गेल्या होत्या. त्यावेळी घरी एकटेच असलेल्या प्रेमचंद यांनी दोरीने घराबाहेर असलेल्या छताला गळफास घेत आपली जीवनयात्रा संपविली. यावेळी परिसरातील नागरिकांनी त्यांना खाली उतरवून तात्काळ जिल्हा शासकीय वैद्यकीय महाविद्यालय व रुग्णालयात दाखल केले. याठिकाणी वैद्यकीय अधिकाऱ्यांनी तपासणी करत मयत घोषीत केले. याप्रकरणी नशिराबाद पोलिसात अकस्मात मृत्यूची नोंद करण्यात आली आहे. त्यांच्या पश्चात पत्नी, मुलगा व मुलगी असा परिवार आहे