ब्रेकिंग : अज्ञात अवजड वाहनाने दुचाकीस्वाराला चिरडले; शिवकॉलनीतील घटना

जळगाव टाइम्स |प्रतिनिधी | जळगाव शहरातील शिवकॉलनी जवळील रेल्वे उड्डाणपुलावर अज्ञात ट्रकने मागून धडक देवून रोडवर पडलेल्या दुचाकीस्वार वृध्दाला चिरडल्याची धक्कादायक घटना गुरूवारी १६ जानेवारी रोजी दुपारी दीड वाजेच्या सुमारास घडली आहे. जिल्हापेठ पोलीस कर्मचारी यांनी घटनास्थळी धाव घेवून मृतदेहाचा पंचनामा करून शासकीय वैद्यकीय महाविद्यालयात रवाना केला आहे. भारमल कौतिक पाटील वय-६२ रा. वैजनाथ ता. एरंडोल असे मयत झालेल्या वृध्दाचे नाव आहे.

याबाबत अधिक माहिती अशी की, भारमल पाटील हे वृध्द आपल्या पत्नीसह एरंडोल तालुक्यातील वैजनाथ येथे वास्तव्याला होते. शेतीकरून आपला उदरनिर्वाह करत होते. आयुर्वेदीक उपचार करण्यासाठी भारमल पाटील हे जळगावा दुचाकी क्रमांक (एमएच १९ बी डब्ल्यू २७३०) जळगाव शहरात येण्यासाठी निघाले. गुरूवारी १६ जानेवारी रोजी दुपारी दीड वाजेच्या सुमारास शिवकॉलनीजवळील रेल्वे उड्डाणपुलावरून शहराकडे जात असतांना मागून येणाऱ्या अज्ञात ट्रकने त्यांच्या दुचाकीला मागून जोरदार धडक दिली. या धडकेत भारमल पाटील हे रस्त्यावर पडल्याने ट्रकने त्यांना चिरडले आणि ते जागीच ठार झाले. ही घटना घडल्यानंतर परिसरातील नागरीक व जिल्हापेठ पोलीसांनी घटनास्थळी धाव घेतली. पंचनामा करून मृतदेह जिल्हा शासकीय वैद्यकीय महाविद्यालयात दाखल करण्यात आले. त्यांच्या पश्चात पत्नी आणि तीन विवाहित मुली असा परिवार आहे. या घटनेबाबत जिल्हापेठ पोलीसात नोंद घेण्याचे काम सुरू होते.